AFFA “Qəbələ”yə ayırdığı 700 min manatı ödəməyi yubadır - Bəs, federasiya nə deyir?

ÖLKƏ FUTBOLU 23 Dekabr 2024 / 18:39 1446

- A +

“Qəbələ” klubunun ötən mövsümün yekununa əsasən, Misli Premyer Liqasını tərk etməsi bu klubun maliyyə dayaqlarına da təsirini göstərdi. “Qəbələ” 1-ci liqaya düşməklə SOCAR-ın kluba ayırdığı 3 milyon manatdan da məhrum oldu.

Lakin çox keçmədən AFFA tərəfindən bölgə təmsilçisinə xoş xəbər verildi. Daha doğrusu, klubun çətinliyini müvəqqəti aradan qaldıracaq qərar. AFFA İcraiyyə Komitəsinin bu ilin 3 iyununda keçirilən iclasında elan olundu ki, federasiya “Qəbələ” İdman Klubuna dəstək olacaq.

Həmin gün yayılan rəsmi məlumatda bildirilib: “İclasda əvvəlcə AFFA-nın 2024-cü il üçün büdcəsi müzakirə edilib. “Qəbələ” İdman Klubuna akademiya və infrastrukturun saxlanılması məqsədilə bir il müddətinə 700 000 (yeddi yüz min) manat maliyyə vəsaitinin ayrılması qərara alınıb.

Bu xüsusda “Qəbələ” İK-ya dəstək üçün müxtəlif yaş qrupları üzrə Azərbaycan milli komandalarının, həmçinin hakimlərin Qəbələdə təlim-məşq toplanışlarının keçirilməsi nəzərdə tutulub”.

Amma həmin qərarın verilməsindən 6 aydan çox keçməsinə baxmayaraq, rəsmi olaraq, ayrılmalı olan pul “Qəbələ” klubuna ödənilməyib. Qəribədir, AFFA milli komandaya Portuqaliyadan mütəxəssislər gətirir, onlarla milyonlarla pul ödəyir, amma nəyə görəsə Azərbaycanda 1 nömrəli infrastuktura malik və ölkədə uşaq futbolunun inkişafı üçün böyük işlər görmüş hazırda ciddi maddi problemləri olan klubun pulunu ləngidir, ya da vermək istəmir. Fernandu Santuşun pulu ləngidilsə idi, bu dəqiqə AFFA-dan FİFA-ya şikayət şikayətin dalınca idi. Elə isə azərbaycanlı balalarının - uşaq futbolunun saxlanmasına yönələcək olan, amma aylardır yolunu gözləyən bu 700 min manat hansı müəmmalı səbəblərdən ləngiyir?

QOL.az saytı bu suala AFFA-nın özündən cavab tapmağa çalışıb. Qurum verdiyi cavabla pulun ödənilmədiyini etiraf edib, amma səbəbləri və mailyyənin nə vaxt köçürüləcəyi haqda qəti cavab verməyib.

Saytımızın sorğusuna verilən yazılı cavabda AFFA-nın mətbuat xidməti bildirib:

“AFFA İcraiyyə Komitəsinin "Qəbələ" İdman Klubuna Akademiya və infrastrukturun saxlanılması məqsədi ilə bir il müddətinə 700 min manat maliyyə vəsaitinin ayrılması barədə qərarı var. “Qəbələ” İdman Klubuna 2024-2025-ci illər mövsümü ərzində həmin məbləğin ödənilməsi nəzərdə tutulub. Bundan başqa, “Qəbələ” İdman klubuna dəstək məqsədi ilə il ərzində müxtəlif yaş qrupları üzrə Azərbycan milli komandalarının Qəbələdə təlim-məşq toplanışları və yoxlama oyunları da keçirilib”.

Bəli, göründüyü kimi, cavabda pul nə vaxt köçəcək, niyə ləngiyir kimi, suallara cavab yoxdur. Amma ümid edək ki, gec də olsa, federasiyanın yeni rəhbərliyi özündə kiçik bir mənəvi təpər - azərbaycanlıllq taparaq tezliklə bu kluba və azərbaycanlı uşaqlara vəd etdiyi sözün, verdiyi qərarın arxasında duracaq.

Daha çox