“Qarabağ” – “Xəzər Lənkəran”: statistika nə deyir?

“Qarabağ” klubunun mətbuat xidməti Unibank Premyer Liqasında növbəti oyunu öncəsi statistik araşdırma hazırlayıb. Qol.Az-ın məlumatına görə, tarixində 17-ci dəfə görüşəcək “Qarabağ”la “Xəzər Lənkəran”ın arxada qalan 7 ildə duellərinə nəzər salınıb.

2004/05 mövsümündə baş tutmuş ilk oyunda Samir Musayevin dublu və Vadim Vasiliyevin möhtəşəm qoluna rəqib yalnız Samir Əliyevin təsəlli qolu ilə cavab verə bildi - 3:1. Əvəzində komandamız üçün çempionluq yolunda çox vacib cavab qarşılaşmasında Lənkəran təmsilçisi qalib gəldi – 0:3.

2005/06 mövsümündə də komandalar hərəyə üç xal qazanıblar. İlk dövrədə “Şəfa” stadionunda keçirilən ev oyununda 2:1 hesabı ilə qələbə qazanan Qarabağ” cavab qarşılaşmasında məğlubiyyətlə üzləşdi – 0:2.

2006/07 mövsümündə rəqiblərdən sevinən tərəf cənub təmsilçisi olur. Bunlar uyğun olaraq 2:0 və 4:1 hesablı qələbələr olur.

2007/08 mövsümündə isə komandalar eyni nəticəni göstərib. “Qarabağ” səfərdə 0:2 hesabı ilə (qolları Elmar Baxşıyevlə Juninyo vurub) uduzsa da, doğma meydanda cənublulara eyni aqibəti yaşatdı. Vaqif Cavadov və Zaur Həşimovun qolları komandaya qələbə gətirdi.

2008/09 mövsümündə İlk oyun Lənkəranda baş tutdu. Vaqif Cavadov, Zaur Ramazanov və Sedat Saininin vurduğu qollara sadəcə Mario Souza uzatma dəqiqələrində cavab verə bildi. Bununla “Qarabağ” 3:1-lik qələbəylə Lənkəranda ilk qələbəsini qazandı. Cavab görüşü isə komandanın Quzanlıda qazandığı ilk 3 xal kimi tarixə düşdü. Artim Şakirinin sona yaxın vurduğu qol ağdamlıların cənublular üzərində ardıcıl 3-cü qələbəsini rəsmiləşdirdi.

2009/10 mövsümündə çempionatının yeni formatı ilə əlaqədar olaraq tərəflər 4 dəfə qarşılaşmalı oldular. Üstəlik, kubokun ¼ final mərhələsində tərəflər münasibətlərini ayırd etməli oldular. Təsnifat mərhələsində ilk dövrədə Quzanlıda baş tutan matçda Rauf Əliyev 85-ci dəqiqədə başla vurduğu gözəl qolla “Qarabağ”a qələbə gətirdi. Fevralın 13-ündə baş tutan cavab görüşündə isə qolsuzluq sükutu pozulmadı. Bu eyni zamanda tərəflər arasında birincilikdə keçirilən 12-ci oyunda ilk heç-heçə kimi tarixə düşdü. Final mərhələsində ilk oyun aprelin 3-də Lənkəranda baş tutdu. Buna qədər 5 oyundur çempionatda cənublulara məğlub olmayan “Qarabağ” 3 il sonra rəqibindən xal ala bilmədi. Kabral və Marionun qollarına Adamiya bir dəfə cavab verə bildi. Cavab görüşündə isə ağdamlılar Rəşad Sadıqov və Rauf Əliyevin vurduğu qollarla 2:1 hesabı ilə qalib gəldi. Kubok qarşıdurmasında isə “Qarabağ” ilk görüşdə 2:1 hesablı qələbə qazansa da, cavab görüşündə məğlub oldu – 0:1.

2010/11 mövsümünün təsnifat mərhələsində bərabərliyi sevməyən komandalar bu dəfə də hərəyə bir qələbə qazandılar. Amma bu dəfə qələbə tərəfləri dəyişdilər. Adətən ev oyunlarında üstün olan komandalar bu dəfə səfərdə 3 xalı qazandılar. Oktyabrın 30-da Tofiq Bəhramov adına Respublika stadionunda baş tutmuş görüşdə nominal ev sahibi olan “Qarabağ” 0:1 hesabı ilə uduzdu. Arbanasın vurduğu baxımlı qol oyunda yeganə oldu. Qış fasiləsinə yollanmamışdan öncə bu dəfə tərəflər 16-cı dəfə üz-üzə gəldilər. Oyun Rauf Əliyevin benefisi ilə yadda qaldı. Təcrübəli Alim Qurbanovun bir qoluna gənc forvardımız dublla cavab vedi.

Beləliklə, arxada qalan 16 görüşdə “Qarabağ” 8 qələbə qazanaraq 7 dəfə məğlub olub. Cəmi 1 görüşdə tərəflər 1 xala razılaşıblar. Topların fərqində isə lənkəranlılar üstündür – 20-17.