AFFA-dan yeni təyinatlar (YENİLƏNİB)

Bu gün Azərbaycan futbol ictimaiyyətinin diqqəti AFFA-ya yönələcək. Qol.Az-ın məlumatına görə, assosiasiyanın inzibati binasında iki mühüm toplantı keçiriləcək.

Saat 10:30-da İcraiyyə Komitəsinin (İK) iclası başlayacaq. Bundan bir saat sonra isə AFFA-nın növbəti Konfransı keçiriləcək ki, onun gündəliyi assosiasiyanın Nizamnaməsinə uyğun olaraq müəyyənləşib. Bunlar gözlənilən, cari məsələlərdir.

İK-nın iclasında əsas müxtəlif yaş qruplarından ibarət yığmalarımızın çalışdırıcılarının təsdiqidir. Bunlar Vəli Qasımovun 19 yaşlılardan ibarət yığmasına (U-19), Təbriz Həsənovun U-17-a, almaniyalı Nikolay Adamın U-16 və U-15-nin baş məşqçi postuna təsdiqi ilə bağlıdır.

Digər məsələlərin bölümündə nəyin müzakirənin olunacağı isə adətən açıqlanmır. Ancaq bu zaman gözlənilməz qərarların olması baş verib ki, indi əsas diqqət legioner limitinə yönəlib. Düzdür, bunun müzakirəyə çıxarılacağı bilinmir. Sadəcə, gələn mövsüm üçün legioner limiti dəyişiləcəksə, indi əsl məqamdır. Çünki İK-nın toplantısından sonra Konfrans keçiriləcək və belə qərarlar istənilən halda, orada təsdiqlənməlidir.

Növbədənkənarı nəzərə almasaq, Konfrans ildə bir dəfə keçirilir. Əgər yeni mövsüm üçün limit dəyişiləcəksə, azaldılacaqsa, klublar indidən bunu bilib, transfer siyasətlərini buna uyğun müəyyənləşdirməlidir.

AFFA-nın İcraiyyə Komitəsinin iclasının gündəliyi

1. Müxtəlif yaş qruplarından ibarət yığma komandaların məşqçilərinin təsdiqi
2. Digər məsələlər

AFFA-nın Konfransının gündəliyi

- Prezident tərəfindən salamlama
- Yığıncağın tərkibinin yoxlanılması
- İcraiyyə Komitəsinin prezident tərəfindən təqdim olunmuş fəaliyyəti haqqında hesabatının təqdim olunması
- Maliyyə hesabatının təsdiq olunması
- Müstəqil auditorun və AFFA-nın Yoxlama və Təftiş Komitəsinin hesabatını nəzərə almaq
- Növbəti ilin büdcəsinin təsdiq olunması
- Hər hansı vakant vəzifəyə seçkilər
- AFFA üzvlərinin təkliflərinin qəbul olunması
- Digər məsələlər

----

Artıq İcraiyyə Komitəsinin iclası başlayıb. İki üzvü Elşad Nəsirov və Cahangir Hacıyev olmadan başlayan yığıncağın ilk dəqiqələri media nümayəndələri üçün açıq olub. Həmin müddətdə Azərbaycan kubokunun 1/4 final mərhələsinin “Neftçi” – “Xəzər Lənkəran” oyunundan bəhs olunub.

Xarici qonaqların, o cümlədən UEFA prezidenti Mişel Platinin müşavirinin qatıldığı iclasda çıxış edən AFFA prezidenti Rövnəq Abdullayev də həmin görüşdən danışıb: “Stadiona gedə bilməsəm də, matçı televiziyadan izlədim. Gözəl, baxımlı oyun alındı. Sevindiricidir ki, azarkeşlər də artıq stadionlara gəlir”.

İcraiyyə Komitəsinin yığıncağı başa çatıb. Konfrans başlayır.

***

Bu gün AFFA-nın İcraiyyə Komitəsinin iclası keçirilib. Aparılan müzakirələrdən sonra aşağıdakı qərarlar qəbul olunub:
1. Nikolay Adamın U-15 və U-16, Təbriz Həsənovun U-17, Vəli Qasımovun isə U-19 Azərbaycan yığma komandasının baş məşqçisi vəzifəsinə təyinatı təsdiq olunsun.
2. Futbol veteranları Cahangir Hüseynov, Bəşir Əliyev, Rafiq Məmmədov və Rafiq Bağırova AFFA-nın təqaüdü verilsin.
3. AFFA ilə Liverpul Universiteti arasında aparılmış danışıqlara uyğun olaraq, futbol idarəçiliyinin təkmilləşdirilməsi ilə bağlı Bakıda Liverpul Universitetinin seminarları təşkil olunsun. Premyer Liqada çıxış edən hər klubun ən azı 1 nümayəndəsinin həmin seminarlarda təhsil alması tövsiyə olunsun.
4. U-13 və U-14 liqalarında çıxış edən komandaların futbolçularının cəzalarının azaldılması ilə bağlı Əsasnamədə dəyişiklik edilsin.
5. AFFA-nın U-11 Liqasının yaradılmasının mümkünlüyü ilə bağlı araşdırma aparılması AFFA-nın baş katibliyinə həvalə olunsun.