“Neftçi” – “Xəzər Lənkəran” matçını “Lider” TV yayımlamayacaq

“Neftçi” – “Xəzər Lənkəran” matçını “Lider” TV yayımlamayacaq
XƏBƏR 2 Mart 2011 / 14:33 3283
-  A +

“Neftçi” klubu NBC Bank Azərbaycan Kubokunun ¼ final mərhələsində “Xəzər Lənkəran” komandası ilə keçirəcəyi ilk ev oyununun yayım hüququnu AzTV-yə verib.

Bu haqda Lent.az-a flaqmanın Mətbuat və İctimaiyyətlə Əlaqələr Departamentinin rəhbəri Elnur Əşrəfoğlu bildirib.

Əşrəfoğlu Unibank Premyer Liqası matçlarından fərqli olaraq, ölkə kubokundakı ev oyunlarının “Lider” TV-yə deyil, AzTV-yə verilməsinin səbəbini belə izah edib: “Biz Premyer Liqadakı ev oyunlarımızın yayımı məsələsində “Palitra” şirkəti ilə anlaşmışdıq. Onlar da yayım hüququnu “Lider” TV-yə vermişdilər. Ölkə kubokundakı ev oyunlarımızın yayım hüququnu isə AzTV-yə verməyi qərara aldıq. Bu telekanalı seçərkən, şirkət nəzdində “İdman Azərbaycan” telekanalının olması və oradakı personalın peşəkarlığı, eləcə də şirkətin rəhbəri Arif Alışanovun idmana xüsusi diqqət və qayğısını nəzərə aldıq. Ümid edirik ki, bu, AzTV vasitəsilə yayımlanacaq son kubok matçımız olmayacaq və əməkdaşlığımız daha da inkişaf edəcək”.

Klub rəsmisi, həmçinin bildirib ki, “Neftçi”nin mövsümün sonunadək öz meydançasında keçirəcəyi çempionat oyunlarını isə yenə “Lider” TV göstərəcək.

Qeyd edək ki, “Neftçi” – “Xəzər Lənkəran” oyunu martın 3-də saat 18:00-dan etibarən AzTV ilə canlı yayımlanacaq.


Son xəbərlər