Aleksandr Starkov sələfi haqda danışmaqdan imtina etdi

“Bakı” klubunun baş məşqçisi Aleksandr Starkov yenidən diqqət mərkəzinə düşüb. Qol.Az-ın məlumatına görə, latviyalı mütəxəssis Rusiya mətbuatına verdiyi müsahibədə Latviya yığması və yeni komandası "Bakı" haqda maraqlı fikirlər səsləndirib:

- Əksər məşqçilər Çempionlar Liqasını daha üstün tuturlar. Siz isə "Skonto"nu çempion etsəniz də bu imkandan yararlanmayacaqsınız. Siz taleyi bilinməyən, hələlik öz çempionatında 7-ci olan komandaya üstünlük verdiniz...

- Bakılılar mənə hələ ötən ilin ortalarında müraciət etmişdilər. O vaxt "Skonto"nu yarı yolda qoya bilməzdim. Mənə yarım il fikirləşmək üçün vaxt verdilər. Sonra Bakıda oldum klubla, iddialı prezidenti Hafiz Məmmədovla tanış oldum. Klubun bazasını, infrastrukturunu, uşaq futbol məktəbini gördüm. Bu təklif mənə daha maraqlı gəldi.

- Etiraf etməlisiz ki, bu qərarınıza maliyyə məsələləri də təsir edib...

- Adətən yeni məşqçiləri uğursuz komandalara dəvət edirlər. "Bakı" çempion olsaydı çətin ki, mənə müraciət edərdilər. Amma "Bakı"da xərclənən pullar klubun turnir cədvəlindəki mövqeyində əks olunmurdu. Hamı ilə çox yaxın olduğum "Skonto"dan ayrılmağa təəssüflənirdim. Lakin yeni çağırış məni cəlb edirdi. Riqada gənclərlə işləyib ÇL-ə vəsiqə qazanmışdıq. Klubun büdcəsi vacib amildir.

- Yeni klubunuzda qarşınıza hansı vəzifə qoyulub?

- Əsas hədəfimiz ilk "6-lığ"a düşməkdir. Hazırda 2-ci mərhələyə 3 tur qalıb ki, bizi 6-cı yerdən 2 xal ayırır. Strateji baxımdan isə liderlər sırasında olmaq, çempionluq və kubok üçün mübarizə aparmalıyıq. Avrokuboklara çıxıb uğurlu çıxış etməliyik.

- Yəqin ki, digər ölkələrdən də təkliflər almısınız. Məsələn Rusiyadan...

- Bəli, təkliflər var idi. Rusiyada mənə maraq azalmayıb. Lakin gerçəkləşməyən təkliflər haqda danışmağın tərəfdarı deyiləm. Digərlərindən fərqli "Bakı" mənim həm yığma, həm klubda çalışmağıma imkan verən təklif etmişdi. Millidə çalışmaq mənim üçün çox qiymətlidir. Seçmə mərhələni başa vurduqdan sonra federasiya məni saxlayıb-saxlamamaqla bağlı qərar verər.

- Yığmanın seçmə mərhələdəki şanslarını necə dəyərləndirirsiniz?

- Biz heç vaxt seçmə mərhələdə favoritlərdən olmamışıq. İndi də qrupumuzda Yunanıstan, Xorvatiya kimi komandalar var. Bizim nəticələr isə reytinqimizə uyğundur. Qrupdan çıxmağımız üçün möcüzə lazımdır. Biz də buna cəhd edirik.

- Azərbaycanlı və latviyalı futbolçuların mentalitetindəki fərq sizi çəkindirmir ki?

- Əlbəttə ki, fərq var. Lakin bu həll olunacaq həddədir. Həm də "Bakı"da legionerlə çoxluq təşkil edir: braziliyalılar, xorvat, holland, Syerra-Leone yığmasının üzvü. Bir sözlə beynəlmiləl heyət var ki, buna istənilən ölkədə rast gəlmək olar.

- Deyilənə görə siz bu əcnəbilərin sayını azaltmısınız. Artıq 3 oyunçu, o cümlədən yerli publikanın sevimlisi Jabanı komandadan kənarlaşdırmısınız...

- Mən bu "3-lüy"ü hələ heç görməmişəm də. Mən komanda ilə Bələkdə tanış oldum. Onları isə ora gətirməmişdilər. Onların taleyinə klub prezidenti aydınlıq gətirəcək. Məncə isə intizamsız oyunçu kluba xeyir verə bilməz.

- Sizin sələfiniz Vinfred Şafer təkcə Almaniyada məşhur deyil. Onun Azərbaycandakı uğursuzluğu sizi qorxutmur ki?

- Sələf haqda danışmaq düzgün deyil. Komanda ilə tanış olub gördüm ki, burada yaxşı, iddialı, ağıllı oyunçular toplaşıb.

- Rusiya futbolunu izləyirsinizmi?

- İzləyirəm. "Spartak"ı və Latviya yığmasındakı yetirməm Saunyanın keçdiyi MOİK-ə diqqət ayırıram. "Spartak" həmişə, nəticələrdən asılı olmayaraq maraq çəkir. Lakin son mövsüm MOİK daha çox diqqətimi çəkdi.