"Trabzonspor" xal itirdi (YENİLƏNİB)

Türkiyə Superliqasında 20-ci tura fevralın 4-də keçirilmiş "Bursaspor" - "Sivasspor" matçı ilə start verilib. Qol.Az-ın məlumatına görə, Bursa "Atatürk" stadionunda keçirilmiş matçda meydan sahibləri qalib gəlib - 2:1.

"Bursaspor"un qollarını 45+1-ci dəqiqədə "Sivasspor"lu Hayrettin öz qapısına, 88-ci dəqiqədə isə yeni transfer Miller vurub. "Sivasspor"dan isə 50-ci dəqiqədə Qrosiçki fərqlənib. Bu qələbə sayəsində "Bursaspor" bir oyun çox olmaqla 44 xalla liderliyə yüksəlib. "Sivasspor" isə 16 xalla 15-ci pillədə qalıb. 

Fevralın 5-də daha 4 oyun olub. "Beşiktaş" öz meydançasında "Karabükspor"la bacarmayıb. Superliqanın bombardiri Emmanuel Emenikenin 55-ci dəqiqədə vurduğu qolla önə çıxan "Karabükspor"un qol sevinci cəmi 4 dəqiqə çəkib. Qonaq komandanın oyunçusu Armand Deumi topu öz qapısına vurub. Amma oyun hakimlərin şousu ilə daha çox yadda qalıb. 51-ci dəqiqədə "Karabükspor"un penaltisini verməyən referi  Mustafa Kamal Abitoğlu 77-ci dəqiqədə "Beşiktaş"lı Uqu Almeydanın zərbəsindən sonra dirəyə dəyib qapı xəttini keçən qolu saymayıb. 59-cu dəqiqədə isə yan xətt hakimi Mehmet Şahan Yılmaz zədələnib. O, 4 dəqiqəyədək müalicə aldıqdan sonra oyuna davam edib. 

"Fənərbaxça" ardıcıl 4-cü qələbəsini səfərdə "Manisaspor" üzərində qazanıb. İkinci hissədə meydan sahibləri hesabı açsa da, qonaqlar buna 3 qolla cavab veriblər. "Kayserispor" isə "Ankaragücü"nü minimal fərqlə yenməyi bacarıb. Bu qələbələrdən sonra "Fənərbaxça" 3-cü, "Kayserispor" isə 4-cü pillələrdəki mövqelərini qoruyub. "Beşiktaş" 5-ci pillədə qalarkən, autsayder "Kasımpaşa"nı məğlub edən "İstanbul BB" oyun sayı üstünlüyü ilə "Eskişehirspor"u keçib və 6-cı pilləyə qalxıb.

Fevralın 6-da keçirilmiş daha 4 görüşlə 20-ci tura yekun vurulub. "Trabzonspor" öz meydançasında "Antalyaspor"u yenə bilməyib. Qolsuz bərabərliklə başa çatan oyundan sonra "Trabzonspor" liderliyini qorusa da, "Bursaspor"u xal sayında yenidən qabaqlaya bilməyib.     

Qeyri-sabit çıxışı ilə seçilən "Qalatasaray" 8 oyundur uduzmayan "Eskişehirspor"u məğlub edib. Azərbaycan yığmasının müdafiəçisi Rəşad Sadıqov ehtiyatda qalıb. "Eskişehirspor" isə qapısında 4 qol görüb.

4 fevral

"Bursaspor" - "Sivasspor" - 2:1
Hayrettin Yerlikaya, 45+1. Kenni Miller, 88 - Kamil Qrosiçki, 50

5 fevral

"Kasımpaşa" - "İstanbul BB" - 1:3
Ersen Martin, 10 - Samuel Holmen, 25. Gökhan Ünal, 51. Ali İbrahim, 69

"Beşiktaş" - "Karabükspor" - 1:1
Armand Deumi, 59-avt. - Emmanuel Emenike, 55

"Kayserispor" - "Ankaragücü" - 2:1
Emir Kujoviç, 78. Marselo Zalayeta, 90+2 - Murat Duruer, 38 
Qırmızı vərəqə: Uğur Uçar, 90+2 ("Ankaragücü")

"Manisaspor" - "Fənərbaxça" - 1:3
Kahe, 54 - Aleks de Souza, 60. Mamadu Nyanq, 73. İssiar Dia, 89

6 fevral

"Konyaspor" - "Qaziantepspor" - 0:2
İvelin Popov, 74. Olcan Adın, 90
Qırmızı vərəqə: Kamil Zayatte, 55 ("Konyaspor")

"Trabzonspor" - "Antalyaspor" - 0:0
Qırmızı vərəqə: Kenan Özer, 90 ("Antalyaspor")

"Gənclərbirliyi" - "Bucaspor" - 1:0
Oktay Delibalta, 64

"Qalatasaray" - "Eskişehirspor"
Lorik Sana, 10. Boqdan Stanku, 14. Harri Kyuell, 45. Milan Baroş, 81 - Burhan Eser, 75. Ümit Karan, 77 

	Komandalar	O	Q	H	M	T	X
1.	Trabzonspor	20	13	5	2	41-13	44
2.	Bursaspor	20	13	5	2	36-13	44
3.	Fənərbaxça	20	13	3	4	46-22	42
4.	Kayserispor	20	11	6	3	27-15	39
5.	Beşiktaş	20	9	5	6	32-22	32
6.	Qaziantepspor	20	8	7	5	19-16	31
7.	İstanbul BB	20	9	2	9	27-23	29
8.	Qalatasaray	20	9	2	9	24-25	29
9.	Eskişehirspor	20	7	7	6	21-21	28
10.	Manisaspor	20	9	1	10	30-31	28
11.	Karabükspor	20	7	5	8	31-32	26
12.	Antalyaspor	20	6	7	7	20-24	25
13.	Ankaragücü	20	5	7	8	27-35	22
14.	Gənclərbirliyi	20	5	6	9	18-30	21
15.	Sivasspor	20	3	7	10	19-36	16
16.	Konyaspor	20	3	6	11	17-30	15
17.	Bucaspor	20	3	6	11	14-29	15
18.	Kasımpaşa	20	1	5	14	15-47	8

Bombardir: Emmanuel Emenike ("Karabükspor") - 13 qol.