Arif Əsədov: "Transferlə bağlı tələsik qərar vermək istəmirik"

XƏBƏR 25 Yanvar 2011 / 16:17 2103

- A +

"Neftçi" futbol klubunun baş məşqçisi Arif Əsədovun Lent.az-a müsahibəsi

- Türkiyənin Antalya şəhərində keçirdiyiniz təlim-məşq toplantıda əsas işiniz nədən ibarət olacaq?

- Artıq yanvarın 24-dən Antalyadayıq. İkinci təlim-məşq toplantısında daha çox yoxlama oyunu keçirməklə, mövsümün ikinci yarısı öncəsi komandamızın durumunu təyin etməli və elə Antalyada transfer işlərimizi başa vurmalıyıq. Hazırlıq prosesi fevralın 4-dək davam edəcək.

- Transfer məsələlərində gecikdiyinizi düşünmürsünüz?

- Xeyr. Mənə elə gəlir ki, gecikmirik. Hər şey ölçülüb-biçilib. Klub rəhbərliyinin siyasəti elə qurulub ki, transferlərimizdə səhv etməməliyik. Ona görə də tələsik qərar vermək istəmirik. Baxışa da çox futbolçu dəvət etmirik. Danışıqlar apardığımız futbolçular səviyyəli olduqlarından, proses bir qədər uzanır. Amma məncə, biz gecikmirik. Hazırkı toplanışda bu məsələ həll olunacaq. Qalan 4 oyunda istədiyimiz heyəti qurmağa, yeni futbolçu da cəlb etməklə, xətlərarası əlaqələr üzərində işləməyə vaxtımız olacaq.

- Ötənlərin bir sıra məşhur futbolçuları var ki, karyeralarının qürub dövründə ərəb və ya Uzaq Şərq ölkələrində çıxış etməyə üstünlük verirlər. “Neftçi”yə bu cür futbolçular təklif etmirlər?

- Bu cür futbolçuları çox təklif ediblər. Amma onlardan imtina etmişik. Bizim istədiyimiz futbolçular Matey Kejman, Ceremi Ncitap kimi adlardan ibarət deyil. Sadəcə, bizə lazım olan mövqeyə və istədiyimiz oyun üslubuna yarayan futbolçuları transfer edirik.

- Sizə kimləri təklif ediblər?

- Mən onların hamısının adlarını çəkmək istəmirəm. Deməyim odur ki, bəlkə də istədiyimiz oyunçu çox tanınmır, amma oyun üslubumuza uyğun gəlir.

- Elə isə necə ola bilər ki, “Neftçi”yə təklif olunan futbolçularla “ilk 5-lik” klubları da maraqlansın?

- İlk təlim-məşq toplantısı zamanı danışıq apardığımız Reni Portuqaliyanın yüksək liqasında çıxış edən “Gimaraynş”ə keçdi. Bu onu göstərir ki, tutduğumuz siyasət, danışıqlar apardığımız futbolçular səviyyəlidirlər.

- Hazırda danışıqlar apardığınız futbolçu var?

- Bəli. Danışıqları toplanışımızın ikinci mərhələsində tamamlayacağıq.

- Ümumiyyətlə, neçə futbolçu almağı planlaşdırırsınız?

- Dayaq yarımmüdafiəçisi və qapıçı mövqeyinə oyunçu transfer etmək fikrindəyik.

- “Qarabağ”la müqaviləni uzatmaqdan imtina edən Elvin Məmmədovun “Neftçi”yə təklif olunduğu bildirilir...

- Əgər belə şey olsaydı, Elvinin “Neftçi”yə keçəcəyi indiyədək bilinərdi. Çox söhbətlər gəzir, amma arada konkret bir şey olmayanda biz buna önəm vermirik. Alacağımız futbolçuları özünüz də görəcəksiniz. Bir az səbirli olmaq lazımdır.

Daha çox