Emin Mahmudov rəsmən "Spartak"da (FOTO)

Emin Mahmudov rəsmən "Spartak"da (FOTO)
XƏBƏR 16 Yanvar 2011 / 01:59 2964
-  A +

Moskvanın "Spartak" klubu Rusiya Premyer Liqasında ötən mövsümün tapıntılarından biri sayılan əslən azərbaycanlı futbolçu Emin Mahmudovla müqavilə bağlayıb. Qol.Az-ın "Spartak"ın rəsmi saytına istinadən məlumatına görə, 1,75 sm boya və 67 kq çəkiyə malik 18 yaşlı yarımmüdafiəçi ilə yanvarın 15-də uzunmüddətli müqavilə bağlanılıb.

"Saturn"un keçmiş mərkəz yarımmüdafiəçisi artıq "qırmızı-ağlar"ın Türkiyədə keçirdiyi təlim-məşq toplantısında iştirak edir və yeni mövsümə hazırlaşır. O, uşaqlıq arzusuna çatdığını açıqlayıb: "Uşaqlıqdan "Spartak"a azarkeşlik edirdim. "Qırmızı-ağlar"ın heyətində mənim sevimli futbolçum İlya Tsımbalar çıxış edirdi. Hələ həmin vaxt özümü yuxuda "Spartak" formasında görmüşdüm. Budur, arzum həyata keçdi. Bu gün həqiqətən də xoşbəxtəm".

Qeyd edək ki, Emin Mahmudov 27 aprel 1992-ci ildə Azərbaycanda doğulub. Rusiya vətəndaşlığına malik futbolçu 2007-ci ildən "Saturn"un gənclərdən ibarət komandasında çıxış edib. Ötən il aprelin 24-də Mahmudov Ramensk komandasının əsas heyətində Moskva "Dinamo"su ilə matçda debüt edib. Premyer Liqanın 29-cu turunda isə o, ilk qolunu "Anji"nin qapısından keçirib. Rusiyanın yeniyetmələrdən ibarət yığmasına dəfələrlə çağırılıb, ötən il Valentin Qranatkinin xatirə turnirində ən yaxşı bombardir olub. Mövsümün sonunda ən yaxşı oyunçular üçün müəyyənləşdirilən "İlk 5-lik" mükafatının səsverməsində 3-cü yeri tutub.

Daha çox


Son xəbərlər