Futbolçu Ceyhun Adışirinovun həbsdən buraxılması üçün prezidentə müraciət olundu

Bakının Hövsan qəsəbəsində yaşayan bir qrup gənc prezident İlham Əliyevə, Əfv Məsələləri Komissiyasının üzvləri Elmira Axundova, Məlahət İbrahimqızı, Zəlimxan Yaqub və Vaqif Səmədoğluna müraciət edib. “Media forum” saytının məlumatına görə, müraciətdə 29 dekabr 2010-cu ildə prezidentin imzaladığı əfv sərəncamına toxunulur və bir məqama diqqət çəkilir: “Hörmətli prezident və komissiya üzvləri! Azərbaycan futbolçusu - “Şahdağ”, “MOİK”, “Bakılı”, “MKT-Araz”, “Qəbələ”, “Karvan“, ”Qarabağ” klublarının, Azərbaycanın olimpiya yığma komandasının şərəfini qorumuş 26 yaşlı istedadlı müdafiəçi Adışirinov Ceyhun Vaqif oğlunun əfv olunma ərizəsinə müsbət cavab verilmədi. Sizin qərarınıza və prezidentin sərəncamına hörmətlə yanaşırıq. Bununla belə, düşünürük ki, gənc futbolçunun, Hövsan qəsəbəsinin Azərbaycan futboluna bəxş etdiyi Ceyhun Adışirinovun əfvi üçün bir çox şeyi nəzərə almaq mümkün idi.

Ceyhun Adışirinov şəxsi avtomobili ilə magistral yolun piyadaların keçidi qadağan olunmuş yerində bir qadını vurub. Hadisə yerindən qaçmayıb, şahidlərlə birlikdə onu xəstəxanaya çatdırıb, ancaq həmin şəxs xəstəxanada keçinib. Sonra Ceyhun polisə könüllü təslim olub. Həlak olan şəxsin dəfn mərasimindən qırx mərasiminə qədər qohumları ilə birlikdə onlara maddi və mənəvi dəstək verib. Mərhumun yaxınları onu bağışlayıb, onlara edilən maddi və mənəvi kömək haqqında sənədi notarial qaydada təsdiq ediblər. Həmin sənədlər 28 fevral 2009-cu ildə Əfv Məsələləri Komissiyasına göndərilmiş sənədlərin siyahısına əlavə edilib.

Ceyhun Adışirinov Xətai Rayon Məhkəməsinin qərarı ilə 3 il 6 ay müddətinə cəzaya məhkum edilib. Cəzasının 1 il 8 ayını çəkib. Saxlandığı 7 saylı Məntəqə Tipli Cəzaçəkmə Müəssisəsinin rəhbərliyi onun əfv olunması üçün müsbət xasiyyətnamə ilə Əfv Məsələləri Komissiyasına müraciət edib.

Ceyhun Cəbrayıl rayonunda doğulub. O, Azərbaycan futbolunda izi olan məcburi köçkün futbolçulardandır. Onun xidmətlərini nəzərə alan Cəbrayıl Rayon İcra Hakimiyyətinin başçısı Mahmud Quliyev də prezidentə və Əfv Məsələləri Komissiyasına Ceyhunun əfv olunması xahişi ilə məktub göndərib. Bu məktub da komissiyaya göndərilmiş sənədlərin siyahısına daxil edilib.

Ceyhunun atası Qarabağ müharibəsi veteranıdır. Yaxın qohumlarından 30 nəfər Azərbaycanın ərazi bütövlüyü uğrunda gedən döyüşlərdə şəhid olub.

Nəhayət, Ceyhun öz əməlindən son dərəcə peşman olub. Çünki o da anasını itirib və hər şeyi yaxsı başa düşür. Əfvlə bağlı müraciətində də bunu səmimi etiraf edib.

Hörmətli cənab prezident, dəyərli komissiya üzvləri! Göründüyü kimi, Adışirinov Ceyhun Vaqif oğlu dövlətimiz və millətimiz ucun itirilmis adam deyil. 26 yaşı var. Onun oynadığı komandalar və AFFA da müvafiq sənədləri Əfv Məsələləri Komissiyasına göndərib. Ümid edirik ki, sizlər biz gənclərin müraciətini cavabsız qoymayacaqsınız. Biz Ceyhun Adışirinovun tezliklə azad olunmasına yardım göstərəcəyinizə inanırıq”.