Azərbaycanın qoca və cavan futbolçuları

Unibank Premyer Liqasında cavan futbolçularla yanaşı yaşlılarda mübarizə aparır. “Qafqazinfonun məlumatına görə çempionatın ağsaqqalları da elə məhz yerlilərdi. Cari mövsümün ən qoca futbolçusu Aslan Kərimovdur. Yanvarın 1-də 38 yaşını tamam edəcək yarımmüdafiəçini bu siyahıda Mahmud Qurbanov izləyir. Qurbanov Kərimovdan 5 ay kiçikdir. “İnter”in çexiyalı yarımmüdafiəçisi Bronislav Çervenka isə həmkarlarından 2 yaş kiçikdir.

Premyer Liqanın gənc futbolçularına gəlincə isə bu siyahıya “Simurq”un yarımmüdafiəçisi Elvin Yunusov başçılıq edir. 16 yaşlı futbolçu həm də son 10 ildə çempionatda çıxış edən ən gənc futbolçudur. Onun digər həmkarları Orxan Sadıqlı, Hacı Əhmədov və Nuran Qurbanovu da futbolumuzun gələcəyi hesab etmək olar.

İşin əsas tərəfinə gəlincə. Premyer Liqada çıxış edən komandaların yaş hədləri ortaya çıxdıqda maraqlı faktlarla üzləşmək olar. Heç kimin ummadığı halda cari mövsümün ən gənc komandası “Simurq”du. Zaqatalalılarda heyət dəyişikliyi onları 2,8 yaş kiçildib. İndi Qyoko Hacievskinin komandasının orta yaş həddi 22,8-dir. Bu siyahıda onları MOİK izləyir. “Hərbiçilər” ən az legionerdən istifadə etdiyi kimi, elə gənc heyət də qurmağa nail olublar. Daim gəncləri ilə öyünən “Turan” ordu klubundan yaş həddinə görə 0,4 yaş geridə qalır. Bu klubların yaş həddinin kiçik olması onların həm də turnir cədvəlində son pillələrdə yer almasına səbəb olub.

Hazırda turnir cədvəlinin lideri “Neftçi” yaş həddinə görə bir çox rəqibini qabaqlayır. Arif Əsədovun komandası ən əsası əzəli rəqibləri " “Gəncə” və “Xəzər Lənkəran”dan müvafiq olaraq 3 və 4 yaş kiçikdir. “Gəncə”dən söz düşmüşkən, Fuad İsmayılovun komandası Premyer Liqanın ən qoca komandasıdır. Gəncəlilərin heyətində futbolçuların əksəriyyətinin yaşının 28-dən yuxarı olması onların həm də çempionluq şanslarını azaldır. Belə ki, sonuncu dəfə 1998/99 mövsümündə Mehman Allahverdiyevin rəhbərliyi altında çempion olarkən, komandanın yaş həddi 25,8 olmuşdu. Belə çıxır ki, hələ “Gəncə” çempion olmaq üçün birinci olaraq yaşlı futbolçularından əl çəkməlidir.

Komandaların yaş həddi

Simurq - 22,8
MOİK - 23,2
Turan - 23,6
Neftçi - 24,2
Qarabağ - 25,6
Qəbələ - 25,75
İnter - 26,03
AZAL - 26,17
Muğan - 26,2
Bakı - 26,9
Xəzər Lənkəran - 27,92
Gəncə - 28,1

Premyer Liqanın “ağsaqqal”ları

Aslan Kərimov - 37 “Qarabağ”
Mahmud Qurbanov - 37 “Bakı”
Bronislav çervenka - 35 “İnter”
Xaqani Məmmədov - 34 “Xəzər Lənkəran”
Rauf Mehdiyev - 34 “Neftçi”
Terri Kuk - 34 “Qəbələ”
Deon Barton - 34 “Qəbələ”
Azər Məmmədov - 34 “Gəncə”
Arman Feutchin - 34 “Gəncə”
Rəfael Əmirbəyov - 34 “Gəncə”
Kənan Kərimov - 34 “Gəncə”

Premyer Liqanın ən cavan futbolçuları

Elvin Yunusov - 16 “Simurq”
Orxan Sadıqlı - 17 “Xəzər Lənkəran”
Hacı Əhmədov - 17 “Bakı”
Nuran Qurbanov - 17 MOİK
Qara Qarayev - 18 “Qarabağ”
Mirhüseyn Seyidov - 18 “Neftçi”