“Həkimlər bu futbolçular haqqında son qərarlarını verməyiblər”

“Həkimlər bu futbolçular haqqında son qərarlarını verməyiblər”
XƏBƏR 11 Oktyabr 2010 / 01:51 1802
-  A +

Milli komandamızın AÇ-2012-nin seçmə mərhələsindəki oyunları ilə əlaqədar Unibank Premyer Liqasında yaranan fasilədə futbolçularına 3 gün istirahət verən “Gəncə” intensiv məşqlərə başlayıb. Qol.Az-ın məlumatına görə, bu barədə komandanın baş məşqçisi Fuad İsmayılov klubun rəsmi saytına açıqlamasında məlumat verib. Onun sözlərinə görə, gündə iki dəfə olmaqla futbolçular əzmlə məşq edirlər: "Qarşıda bizi çətin qarşılaşmalar gözləyir. Komandada gözəl əhval-ruhiyyə var. Məşqlər intensiv xarakter alıb. Lakin Rafael Əmirbəyovun bir oyunluq cərimə olunması, Armando Qay və Zura Dzamsaşvilinin zədəli olması bir az bizi təəsüfləndirir. Həkimlər hələ ki, bu futbolçular haqqında son qərarlarını verməyiblər. Amma komanda bütün var gücü ilə doğma azarkeşlər qarşısında qələbə üçün meydana çıxacaqlar".
Fuad İsmayılov əlavə edib ki, 17 oktyabrda keçiriləcək “Xəzər Lənkaran”la qarşılaşmada yetərincə azarkeşin olacağına və onların komandanı sona qədər dəstəkləyəcəklərinə ümid edir: "Bizim azarkeşlər, Gəncə futbolunu sevənlər həmişə komandanı ürəklə, sona qədər dəstəkləyiblər. Bu oyunda da onların futbola olan məhəbbətinin şahidi olacağımıza inanıram".


Son xəbərlər