Zeynal Məmmədov: “Tümer Metin bu yaşda perspektiv barəsində fikirləşmir»

“Bakı”nın vitse-prezidenti Zeynal Məmmədov klubun rəsmi saytına müsahibə verib. Qol.Az müsahibəni təqdim edir

- “Bakı” 18 gündür ki, Antalyada təlim- məşq toplanışındadır. Bu müddət ərzində komandanın hazırlığını necə dəyərləndirirsiniz?
- Birinci dövrənin bitməsi ilə futbolçular təxminən bir aylıq istirahət imkanı qazandı. İstirahət bəzi futbolçuların artıq çəki almasına, qismən formadan düşmələrinə səbəb oldu. Antalya toplanışının əsas məqsədləri futbolçuların ideal formaya düşməsinə şərait yaratmaq, yeni futbolçuların komandaya uyğunlaşmasını təmin etmək və yoldaşlıq oyunlarında gücümüzə bir daha baxmaq imkanı qazanmamız idi. İki günə Antalya toplanışı sona yetir. 5 yoldaşlıq oyunu keçirmişik. İkisini də keçirmək planımız var. 20 gün müddətində 7 matç oynamaqla komandadakı çatışmazlıqlarımızı aşkara çıxarıb səhvlər üzərində işlədik. Transfer etmək istədiyimiz futbolçuları iş başında izləyib daha düzgün qərar verdik
- Antalyada komandanızın düşərgəsinə baxışa gəlmiş futbolçulardan biri də Mərakeş millisinin üzvü Hasan Souaridir...
- Baş məşqçimiz Coko Hacıyevski onu bəyənib. Hasanla müqavilə bağlanılacaq. Müqavilənin şərtlərini 90 faiz razılaşdırmışıq. Bir neçə günə futbolçu Bakıya gələcək. Müqavilənin müddətini isə 1+1 il nəzərdə tutmuşuq.
- Tümer Metin niyə əldən çıxdı?.
- “Fənərbaxça»lını “Bakı”ya gətirmək üçün təklifimizi etmişdik. O “Larisa ”nı seçdi. Bu, futbolçunun öz haqqıdır. Görünür “Larisa” Tümeri daha sərfəli maliyyə şərtləri ilə razı sala bilib. Həm də, türkiyəli bu gün karyerasının qürubunu yaşayır. Bu yaşda o perspektiv barəsində fikirləşmir.  Karyerasının sonunda pulu əsas tutması başadüşüləndir.
- Komandanızı ikinci dövrəyə hazır sayırsınızmı?
- Birinci dövrə göstərdi ki, komandanın oyununda müəyyən çatışmazlıqlar var. Heyətin əksəriyyəti yeni futbolçulardan qurulduğu üçün bir sıra problemlər oldu. Xəttlər arası əlaqə, hücum xəttinin oyunu bizi qane etmədi. Komanda əsas oyunlarda istədiyimiz nəticəni qazanmadı. İkinci dövrədə “Bakı” daha baxımlı futbol sərgiləyəcək. Heyət artıq formalaşıb. Bir neçə yeni futbolçu var ki, onların da bəziləri artıq komandanın oyun üslubuna tam uyğunlaşıb.
- İkinci dövrənin başlanmasına 11 gün qalıb. Premyer liqanın ikinci dövrəsində favoritlərin sırasında hər hansı dəyişiklik olacağını gözləyirsinizmi?
- Hər bir komanda bacardığı qədər yaxşı transferlər etdi. İstər iddialı istər iddiasız, hər bir komanda müəyyən büdcəyə görə futbolçular aldı. Favorit komandalar yenə də digərlərindən fərqləndi. Türkiyədə təlim - məşq toplanışları, səviyyəli legionerlərin heyətə cəlb edilməsi, güclü komandalarla yoldaşlıq oyunları və bu kimi önəmli məsələlərdə yenə də iddialı klublar öz işini gördü. İndi qalır premyer liqanın startını gözləmək. Kimin necə hazırlaşdığını, yaxşı və ya pis transferlər etdiyini yaxın bir ayda görəcəksiniz. Turnir cədvəlinin 1 və 7-ci pilləri arasında olan bütün klublar çempionluq üçün oynayır. Bu klubların bir-birləri oyunları xüsusi ilə ağır olacaq. Potensial olaraq lap elə “Standard”ın da çempionluq şansı var. Autsayderlər isə qeyri stabil oyunları ilə fərqlənəcək.
- “Böyük “Bakı”- 2012” layihəsinin icrasına başlanılıb. İşlər nə yerdədir?
- Klub prezidenti Hafiz Məmmədov 2012-ci ilə qədər komandanın peşəkarlaşması məqsədi ilə bu layihəni təsdiq etdi. Layihə barəsində KİV-i də məlumatlandırmışıq. Proyektin əsas məqsədləri “Bakı”nın uşaq futbol məktəblərinin qurulması, baza, stadion və UEFA standartlarına uyğun idarəetmə sisteminin tətbiq edilməsidir. Artıq bəzi işlər görülüb. Yaxın vaxtlarda yeni məşq meydançamız da istifadəyə veriləcək. Uşaq futbol komandalarımızın yaradılması, yeni istedadların axtarılması istiqamətində də çalışmalarımız davam edir. Hər şey planlaşdırdığımız kimi olsa, 2012-ci ilə qədər “Bakı”nın əsas komandasının heyətində 7-8 yetirməmizin oynayacağını düşünürük. Bu layihə təkcə “Bakı”ya yox Azərbaycan futbolunun inkişafına xeyir verəcək.