U-21 qrup sonunculuğundan çıxmaq üçün ən azı heç-heçə etməlidir

Bu gün 21 yaşadək futbolçulardan ibarət yığmalar arasında 2011-ci ildə keçiriləcək Avropa çempionatının seçmə mərhələsinə yekun vurulacaq. Qol.Az-ın məlumatına görə, cari seçmə tsikldə heç də uğurlu çıxışı ilə fərqlənməyən U-21 millimiz seçmə mərhələyə Belarusla səfər oyunuyla yekun vuracaq.
Məlum olduğu kimi, komandamız son oyuna kimi cəmi 1 xala malik idi. Lakin bir neçə gün öncə doğma divarlar arasında Albaniya millisi üzərində qələbə qazanan Bernard Lippertin komandası bununla həm cari seçmə tsikldəki, həm də 9 illik qələbəsizlik seriyasına son qoymuş oldu. Həmin qələbə isə yığmamızı qabaqlayan albanlarla xallarımızı bərabərləşdirməyə yetərli olsa da, qrup sonunculuğundan yaxa qurtarmağımıza imkan vermədi. İndi 21 yaşlılarımızın nəhayət qrup sonunculuğundan çıxmaq üçün son bir şansı var. Nəzərə alsaq ki, albanlar elə millimizlə Bakıdakı oyunla bu seçmə tsiklə tam şəkildə yekun vurdu, deməli, Lippertin komandası hətta heç-heçə etməklə də, bu şansdan yararlana bilər. Ancaq komandamızın Belarusla qarşılaşmada uğur qazanması elə də yüksək qiymətləndirilmir. İlk növbədə ona görə ki, təmsilçimiz bu rəqibi ilə Bakıdakı oyunda belə xal qazana bilməmiş və 2:3 hesablı məğlubiyyətlə barışmışdı. Digər tərəfdən belaruslar hazırda qrup lideri kimi birbaşa AÇ-nin final mərhələsinə yüksəlmək şansına malikdir və onların autsayder rəqibi ilə xal itirmək haqda qətiyyən düşünmədiyi dəqiqdir.
Maraq üçün qeyd edək ki, hər şeyə rəğmən, millimizin səfərdən sərfəli nəticə ilə dönəcəyinə dair müəyyən ümid yeri də var. Məsələ burasındadır ki, Berti Foqtsun əsas komandamızın heyətinə cəlb etdiyi Elvin Məmmədov, Cavid Hüseynov kimi aparıcı oyunçuların 21 yaşlıların düşərgəsində olması, albanlarla oyundakı uğurun davamının gələcəyinə dair ümidlərimizi çoxaltmaya bilməz. Hansı ki, ilk qələbəmizin qazanılmasında da bu futbolçuların az rol oynamadığı şübhəsizdir. Düzdü, Cavidlə Elvinin U-21-in oyunundan sonra əsas millimizin Almaniyadakı düşərgəsinə yollanacağı gözlənilsə də, bu baş vermədi və onlar Belarusa aparılan heyətə də daxil edildi. Yeri gəlmişkən, hər Məmmədovla Hüseynovun artıq U-21 karyerası da Borisovdakı oyunla başa çatmış olacaq. Çünki 1989-cu il təvəllüdlü oyunçuları bundan sonra ancaq əsas komandamızın düşərgəsində görə biləcəyik. Deməli, hər iki futbolçu 21 yaşlıların heyətindəki son qarşılaşmadan qənaətbəxş nəticə və xoş əhval-ruhiyyə ilə ayrılmaq üçün əlindən gələni əsirgəməməlidir.
Qeyd edək ki, Belarusun Borisov şəhərinin mərkəzi stadionunda keçiriləcək Belarus – Azərbaycan oyunu Bakı vaxtı ilə 20:00-da start götürəcək. Qarşılaşmanı Yunanıstandan olan hakimlər briqadası idarə edəcək.

U-21-lər arasında AÇ-2011-in seçmə mərhələsi
7 sentyabr

20:00. Belarus – Azərbaycan
Baş hakim: Stavros Tistonis (Yunanıstan)
Borisov. Şəhər stadionu

1. Şotlandiya               7          4          2          1          14-6     14

2. Avstriya                  7          4          2          1          16-9     14

3. Belarus                   7          4          2          1          15-11   14

4. Albaniya                  8          1          1          6          11-20   4

5. Azərbaycan             7          1          1          5          8-18     4