Valeri Abramidzedən Gürcüstan yığmasının baş məşqçisinə etiraz

“Komandada vəziyyət yaxşıdır. Yoldaşlarımı çoxdan tanıdığım, kollektivdə yerlilərim olduğu üçün komandaya uyğunlaşmaqla bağlı heç bir problemlə üzləşmədim”. Qol.Az-ın məlumatına görə, bu sözləri “İnter”in futbolçusu Valeri Abramidze klubun azarkeş saytına açıqlamasında deyib.
Təcrübəli futbolçu öncə “Xəzər Lənkəran”la son oyun barədə fikirlərini bildirib: “Komandamızın heyətində itkilər olduğu üçün oyunu müdafiədən qurmuşduq. Rəqib komanda cəmi bir real qol vəziyyəti yaratdı, onda da qapıçımız Georgi Lomaya müdafiəçilərin səhvini sığortalayıb topun qapı xəttindən keçməsinə imkan vermədi. Qalan vaxt ərzində biz öz oyunumuzu oynayıb rəqibə heç bir şans vermədik”.
Abramidze Lənkəranda qol vura bilməmələrini heyətdəki itkilərlə izah edib: “Qeyd etdim ki, komandamızın heyətində itkilər var idi. Buna görə də hücuma keçən zaman müdafiə haqqında düşünürdük. Mənə elə gəlir ki, bu səbəbə görə rəqib qapısına yol tapa bilmədik”.
“İnter”in futbolçusu “Xəzər Lənkəran”ın yeni transferi Dieqo Ruizi tərifləyib: “Xəzər Lənkaran”a yeni transfer olunan oyunçulardan Dieqo Ruizin oyunu diqqətimi cəlb etdi. Fiziki göstəricilərinə görə çox güclü olan futbolçu oyunboyu bizə pressinq tətbiq edirdi. Ümumiyyətcə Ruizə qarşı oynamaq ağır idi”.
Gürcü futbolçu “Neftçi” ilə həftəsonu baş tutacaq oyunla bağlı da danışıb: “İnter”lə “Neftçi” arasında keçirilən oyunlar daim gərginliyi ilə seçilib. Hətta deyərdim ki, bu qarşılaşmanı derbi də adlandırmaq olar. Hansı komandaya qarşı oynamağamızdan asılı olmayaraq hər qarşılaşmaya yüksək əhval-ruhiyyə ilə çıxmalıyıq. Baş məşqçi bu oyunda mənə şans versə, meydanda komandamın qələbə qazanması üçün əlimdən gələni edəcəyəm. Bu oyuna xüsusi bir hazırlıq keçmirik. Həmişəki kimi həftəlik plan üzrə, bütün oyunlara necə bu oyuna da elə hazırlaşırıq”.
Gürcüstan yığmasına Rusiya çempionatının birinci divizionunda top qovan futbolçular çağırılsa da, Azərbaycan Premyer Liqasından oyunçular milliyə dəvət almır. Yığmanın baş məşqçisi bir müddət əvvəl bəyan edib ki, Azərbaycanda top qovan gürcüləri milli komandanın sıralarına dəvət etməyəcək. Abramidze gürcü mütəxəssisin həmin qərarına etirazını dilə gətirib: “Azərbaycan klublarında oynamayan futbolçular elə düşünürlər ki, buranın çempionatı aşağı səviyyədədir. Vətənimdən bura gələn futbolçular bir-iki oyuna çıxandan sonra əmin olurlar ki, Azərbaycanda futbol düşündükləri kimi zəif deyil. Gürcüstandan bura gələn dostlarım Premyer Liqanın bəzi oyunlarına baxdıqdan sonra mənə bildirdilər ki, səviyyəcə Azərbaycan çempionatı Gürcüstan çempionatını üstələyir. Gürcüstan milli komandasının baş məşqçisinin fikirlərinə gəldikdə isə o, bu sözlərlə milli komandada oynamağa layiq olan bir neçə futbolçunun xidmətindəm məhrum oldu. Milli baş məşqçinin deyil, xalqın komandasıdır və bu komandada ən güclü futbolçular iştrak etməlidirlər. Bu qərarı milli komandanın baş məşqçisi qəbul edib və biz ona hörmətlə yanaşmalıyıq”.