“Neftçi”yə İtaliyadan daha bir dəvət gəldi

“Neftçi”yə İtaliyadan daha bir dəvət gəldi
XƏBƏR 19 Avqust 2010 / 15:50 2259
-  A +

Azərbaycanın ən köklü klubu olan "Neftçi" PFK-da uşaq və yeniyetmə futboluna böyük diqqət göstərilir. Bunun nəticəsidir ki, flaqmanın aşağı yaş qruplarından ibarət komandaları bir qayda olaraq, həm daxili, həm də beynəlxalq yarışlarda uğurla çıxış edir. Beynəlxalq miqyasda qazanılan ən son uğur isə İtaliyada olub. Belə ki, "Neftçi"nin 17 yaşlılardan ibarət komandası bu ilin mayında İtaliyada ənənəvi olaraq keçirilən "Ciociaria World Cup" turnirində layiqli mübarizə aparıb. "Kiçik dünya çempionatı"na qatılan 32 komanda arasında 6-cı yerə çıxan "Neftçi"nin parlaq oyunu digər mötəbər turnirlərin təşkilatçılarının diqqətindən yayınmayıb. Qol.Az-ın paytaxt klubunun rəsmi saytına istinadən məlumatına görə, "ağ-qaralar" bu dəfə "VİAREGGİO CUP" yarışına dəvət alıb. Əsasnaməyə görə, bu turnirə 1991-ci il və daha aşağı yaşlı futbolçulardan ibarət kollektivlər qatılırlar. "VİAREGGİO CUP"da dünyanın ən tanınmış klubları - İtaliyanın "Milan", "İnter", "Yuventus", "Fiorentina", "Latsio", "Parma", Braziliyanın "Qremio", Polşanın "Legiya", Rusiyanın "Spartak", İsrailin "Makkabi" Hayfa, Belçikanın "Anderlext", Özbəkistanın "Paxtakor" və digər komandalar mübarizə aparıblar. Bu il 62-ci dəfə təşkil olunan turnirin qalibi "Yuventus" olub. Turin təmsilçisi finalda "Empoli"ni 4:2 hesabı ilə məğlub edərək, baş mükafata sahib çıxıb. "Neftçi"nin dəvət aldığı sayca 63-cü turnir 2011-ci il 21 fevral -7 mart aralığında gerçəkləşəcək.

Daha çox


Son xəbərlər
21.12.25  18:54

PSV-dən yeni rekord

20.12.25  22:54

Yamal, Haaland, Keyn...