Mübariz Mənsimov yeni gəmisinə Milli Qəhrəman Mübariz İbrahimovun adını verdi

XƏBƏR 4 Avqust 2010 / 18:39 2336
-  A +

“Palmali” Şirkətlər Qrupu Azərbaycan qəhrəmanları, ziyalıları və tarixi guşələrimizi dünya sularında tanıtmağı davam etdirir.
Şirkətin mətbuat xitmətindən verilən xəbərə görə, "Palmali" Şirkətlər Qrupunun prezidenti, "Xəzər Lənkəran" klubunun sahibi Mübariz Mənsimovun göstərişi ilə Armada tipli gəmiyə Milli Qəhrəman Mubariz İbrahimovun adı verilib. Sözügedən gəmi oktyabr ayının 15-də Türkiyədə Beşiktaş gəmiqayırma zavodundan suya endiriləcək.

Türkiyədə suya endiriləcək gəmi Milli Qəhrəman Mübariz İbrahimovun adını dünya sularında tanıdacaq.

2009-cu ildə "Palmali" Şirkətlər Qrupu və Beşiktaş gəmiqayırma zavodu arasında 10 Armada tipli tankerin inşaası ilə bağlı müqavilə imzalanıb. Milli Qəhrəman Mübariz İbrahimovun adını daşıyacaq gəmi bu seriyadan suya endiriləcək ilk gəmi olacaq.

Xatırladaq ki, Azərbaycan Silahlı Qüvvələrinin giziri Mübariz İbrahimov bu il iyun ayının 18-də cəbhənin Tərtər rayonunu Çaylı kəndi istiqamətində Ermənistan Silahlı Qüvvələrinin hücumunu dəf edərkən bir neçə erməni əsgərini öldürərək qəhrəmancasına şəhid olub. 22 yaşlı gizir Mübariz İbrahimovun meyiti ermənilər tərəfindən götürülüb və hələ də geri qaytarılmayıb.

Azərbaycan Prezidenti İlham Əliyevin sərəncamı ilə gizir Mübariz İbrahimova Milli Qəhrəman adı verilib.

Mənbə: Milli.Az


Son xəbərlər
20.12.25  22:54

Yamal, Haaland, Keyn...

20.12.25  10:02

Salah üzr istəyib