Rəşad Abdullayev: “Artıq nəticə qazanmağın vaxtı çatıb”

Rəşad Abdullayev: “Artıq nəticə qazanmağın vaxtı çatıb”
XƏBƏR 21 İyul 2010 / 11:45 2078
-  A +

"Avstriyada olduğu kimi, Türkiyədə də çox ciddi hazırlaşırıq. Premyer Liqanın startına 20 gündən də az qalıb. Məqsədimiz çempionata hazır olub, ən yüksək yerlər uğrunda mübarizə aparmaqdır". Qol.Az-ın məlumatına görə, bu sözləri "Neftçi"nin yarımmüdafiəçisi Rəşad Abdullayev klubun rəsmi saytına açıqlamasında deyib.
Təcrübəli futbolçu Türkiyənin Bolu şəhərində keçirilən təlim-məşq toplanışının gedişindən danışıb. O bildirib ki, növbəti mövsümdə əsas hədəf  "Neftçi"nin öz oyun üslubunu qaytarmaqdır: "İstəyirik ki, "Neftçi" əvvəlki kimi, özünəməxsus futbol oynasın. Topa daha çox nəzarət etməli, sürətli oyuna üstünlük verməliyik. Son 1-2 mövsümdə müdafiəyə daha çox diqqət yetirirdik. İndi isə hücuma meylli futbola üstünlük veririk. Yoldaşlıq görüşlərində bu əsas amil kimi götürülür. Bəzən elə olur ki, təlim-məşq toplanışında komandanın nəticələri yaxşı olmasa da, çempionatda yüksək nailiyyətlər əldə edir".
Abdullayev sabah "Orduspor"a qarşı keçiriləcək yoldaşlıq görüşünə də toxunub: "Türkiyənin birinci liqasının təmsilçisi olan rəqibimiz güclü komandadır. Yoxlama matçı olmasına baxmayaraq, qalib gəlməliyik. Çünki artıq nəticə qazanmağın vaxtı çatıb".


Son xəbərlər