Təbriz Həsənov: “Uşaqların məşqlərdəki canfəşanlığı məni qane edir”

XƏBƏR 30 İyun 2010 / 16:12 1651

- A +

16 yaşadək futbolçulardan ibarət Azərbaycan yığma komandasının baş məşqçisi Təbriz Həsənovun müsahibəsi.

- Artıq bir neçə gündür Almaniyadasınız. Bu müddətdə 3 yoxlama görüşü keçirmisiniz. Hazırlıq necə gedir?
- Burada bizim üçün hər cür şərait yaradılıb. Plana uyğun şəkildə hazırlığımızı davam etdiririk. Gündə iki dəfə məşq edir, oyun günləri isə bir məşqlə kifayətlənirik. Uşaqlar özlərini yaxşı tərəfdən göstərməyə çalışırlar. Onların məşqlərdəki canfəşanlığı məni qane edir. Keçirdiyimiz yoxlama görüşlərində də var gücləri ilə mübarizə aparırlar.
- Hazırlıq zamanı əsasən nəyə üstünlük verirsiniz?
- Bakıdakı təlim-məşq toplanışında əsasən fiziki hazırlıq üzərində çalışırdıq. Burada isə texniki və taktiki hazırlığa üstünlük veririk.
- Yoldaşlıq görüşləri barədə nə deyə bilərsiniz?
- Almaniyadakı təlim-məşq toplanışının əsas cəhətlərindən biri güclü rəqiblərlə qarşılaşmaqdır. Bildiyiniz kimi, indiyədək 3 oyun keçirmişik və hər üçündə qələbə qazanmışıq. Ancaq bu cür hazırlıq xarakterli təlim-məşq toplanışlarındakı yoldaşlıq oyunlarının nəticəsinin elə bir əhəmiyyəti yoxdur. Əsas odur ki, uşaqların son hazırlığını nəzərdən keçirirəm. Hansı mövqelərdə çatışmazlıq varsa, onu araşdırıram. Çalışıram ki, buraya gətirdiyim 23 futbolçunun hər birinə şans verim.
- Növbəti yoxlama görüşləri olacaqmı?
- Bəli, qarşıda daha 4 yoxlama görüşü keçirməyi planlaşdırırıq. Almaniyanın əyalət yığmalarının komandaları ilə qarşılaşacağıq.
- Komandada nə kimi çatışmazlıqlar aşkarlamısınız?
- Təbii ki, hər bir komanda kimi bizim də müəyyən çatışmazlıqlarımız var. Yoldaşlıq oyunlarının əsas məqsədi də məhz bu çatışmazlıqları tapıb aradan qaldırmaqdır. Məşqlərdə əsasən bunlar üzərində çalışırıq. Çalışacağıq ki, təlim-məşq toplanışının sonunadək çatışmazlıqları aradan qaldıraq.
- Almaniyada komandamıza maraq varmı?
- Bildiyiniz kimi, biz ötən qış da məhz burada hazırlıq keçmişdik. Yəni az-çox tanıyırlar. Oyunlarımızı gəlib izləyirlər.
- Oyunları izləyənlər arasında menecerlər də varmı?
- Bu barədə geniş məlumatım yoxdur. Keçirdiyimiz oyunlarda qələbə qazandığımızı eşidiblər. Yəqin ki, bundan sonrakı oyunlarımızı izləyərlər.
- Təşkilati işlər sizi qane edirmi?
- Təşkilatçılıq yüksək səviyyədədir. Əla ot örtüyü olan meydançalarda məşq edirik. Komandada zədəli futbolçu yoxdur. Tam heyətlə hazırlıq keçirik. Hava şəraiti də məşq keçmək üçün tam əlverişlidir. Heç bir çətinliyimiz yoxdur.

Daha çox