“Xəzər Lənkəran” dəvət etdiyi ilk legionerin adını açıqladı

“Xəzər Lənkəran” dəvət etdiyi ilk legionerin adını açıqladı
XƏBƏR 11 İyun 2010 / 11:43 2889
-  A +

“Xəzər Lənkəran”ın mövsümlərarası fasilədə düşərgəsinə dəvət etdiyi legionerlərdən birinin kimliyi müəyyənləşib. Qol.Az-ın məlumatına görə, iyunun 7-dən hazırlıqlara başlayan cənub təmsilçisinin məşqlərinə yerli futbolçularla yanaşı, gürcü legioner də qatılıb. Bu, vaxtilə Kiyev “Dinamo”sunda çıxış etmiş David İmedaşvilidir. “VİT-Corciya” klubunun yetirməsi olan 26 yaşlı müdafiəçi 2006-2009-cü illərdə Ukraynanın ən titullu komandasında olsa da, burada möhkəmlənə bilməyib.
“Dinamo-2”ni də nəzərə alsaq, cəmi 15 oyunda Kiyev təmsilçisinin şərəfini qoruyan İmedaşvili icarəyə verilib. O, Latviyada “Ventspils”, Macarıstanda “Nyerihaza” klubunda icarə əsasında çıxış edib. Ukraynanın “Zakarpatye” və Yunanıstanın məşhur PAOK klublarında baxışda olub bəyənilməyən Davit ötən yay vətənə dönüb. Son bir ildə Rustavi “Olimpi”sində forma geyinib. Bu komandanın heyətində Gürcüstan çempionu olmuş İmedaşvili, həm də Gürcüstanın ən yaxşı yarımmüdafiəçisi seçilib.
Ölkəsinin 21 yaşadək futbolçulardan ibarət yığmasında 11 matç keçirən İmedaşvili əsas yığmada 2006-cı ildə debüt edib. Lakin Ukrayna ilə ilk oyunu millidə sonuncu qarşılaşma olub.
Qeyd edək ki, “Xəzər Lənkəran”ın təlim-məşq toplanışı ərzində Xorvatiya, Belarus, Rumıniya, Serbiya və Latviya kimi ölkələrdən olan daha bir neçə futbolçunu baxışdan keçirəcəyi gözlənilir.


Son xəbərlər
17.12.25  15:40

Levandovski MLS yolunda