“Neftçi” PFK-nin əməkdaşları Cəzaçəkmə Müəssisəsində olublar

XƏBƏR 16 Aprel 2010 / 16:28 2117
-  A +

Bu gün Azərbaycan Milli Olimpiya Komitəsi və Penitensiar Xidmətinin 15 saylı Cəzaçəkmə Müəssisəsinin birgə təşəbbüsü ilə idman tədbiri keçirilib. Qol.Az-ın məlumatına görə, tədbirə Milli Olimpiya Komitəsinin nümayəndələri ilə yanaşı, “Olimpiya dünyası” qəzetinin baş redaktoru Murad Fərzəliyev, “Neftçi” PFK-nın Mətbuat və İctimaiyyətlə Əlaqələr Departamentinin rəisi, Milli Olimpiya Komitəsinin üzvü Elnur Əşrəfoğlu və Azərbaycan Şahmat Federasiyasının əməkdaşları da qatılıblar.
Tədbiri giriş sözü ilə açan 15 saylı Cəzaçəkmə Müəssisəsinin rəisi Mirsaleh Seyidov qonaqları salamlayaraq, müəssisədə məhbusların idmanla məşğul olmaları üçün bütün şəraitin yaradıldığını bildirib. Daha sonra çıxış edən “Neftçi” PFK-nın Mətbuat və İctimaiyyətlə Əlaqələr Departamentinin rəisi Elnur Əşrəfoğlu idmana dövlət səviyyəsində diqqət və qayğı göstərildiyini vurğulayıb: “Milli Olimpiya Komitəsinin də prezidenti olan dövlət başçımız İlham Əliyev sözün əsl mənasında, idmanın dostudur. Artıq ölkəmiz dünyanın idman mərkəzinə çevrilib. “Neftçi” Peşəkar Futbol Klubu klubu cəzaçəkmə müəssisələrində təşkil olunan idman tədbirlərində həmişə fəal iştirak edir. Tam əminliklə söyləmək olar ki, hazırda futbolumuz etibarlı əllərdədir. AFFA prezidenti Rövnəq Abdullayevin rəhbərliyi altında futbolumuzun inkişafı istiqamətində çox uğurlu işlər aparılır. Bu müəssisədə cəza çəkənlərin idmanla məşğul olmasını alqışlayıram və onların tezliklə azadlığa qovuşmasını arzulayıram”.
Ardından “Neftçi” PFK-nın Mətbuat və İctimaiyyətlə Əlaqələr Departamenti əməkdaşlarının da yer aldığı jurnalistlərdən ibarət komanda ilə məhbuslar arasında şahmat və futbol yarışları baş tutub. Yarışdan sonra 15 saylı Cəzaçəkmə Müəssisəsində cəza çəkənlərə Milli Olimpiya Komitəsi, “Neftçi” klubunun və “OlimpSport” jurnalının hədiyyələri bağışlanılıb. Qərara alınıb ki, növbəti belə tədbir ümummilli lider Heydər Əliyevin 87-ci ildönümü münasibətilə mayın 10-da keçirilsin.


Son xəbərlər