"Qarabağ"da qapıçının işi az olur” - Fərhad Vəliyev

"Sumqayıt"ın qapıçısı Fərhad Vəliyevin Qol.az saytına müsahibəsi

- Topaz Premyer Liqada məğlubiyyətsizlik seriyanız qırıldı. Ardıcıl 7 oyun uduzmayan komandanız "Neftçi" ilə qarşılaşmadan xalsız ayrıldı.

- Bəli, uğurlu seriyamızı davam etdirmək istəyirdik. Ən azı bir xal götürüb 4-cü pilədəki yerimizi möhkəmləndirmək fikrimiz var idi. Komandamız yaxşı mübarizə apardı. Düzdür, "Neftçi"nin qol epizodları daha çox idi, ancaq futbolçularımız nəticə qazanmaq üçün əzmkarlıq göstərdilər. Hava şəraiti yaxşı olmasa da, komandamız sonadək vuruşdu. Qolu sonda buraxdığımıza görə daha çox məyus olduq.

- Oyunun ən yaxşılarından idin. "Neftçi"nin baş məşqçisi Elxan Abdullayev də oyundan sonra bildirdi ki, Fərhad bizə çox qol vurmağa imkan vermədi.

- Oyundan sonra Elxan müəllim də məni təbrik etdi. Öz məşqçilərimiz və komanda yoldaşlarım da minnətdarlığını bildirdi. Mən hər oyun çalışıram k, qol buraxmayım. Təbii ki, məğlub olanda qapıda necə durmağından asılı olmayaraq, təəssüflənirsən.

- "Qarabağ"da qapıda durmaq asandır, yoxsa "Sumqayıt"da?

- "Qarabağ"ın müdafiə xətti "Sumqayıt"la müqayisədə daha güclüdür. "Qarabağ"ın qapısı qarşısında qol epizodları az olur. Amma "Sumqayıt"da qapıçının üzərinə daha çox iş düşür. Bu, bir tərəfdən yaxşıdır. Rəqibin zərbələrini dəf etdikcə qapıçı həm ruhlanır, həm də oyun təcrübəsi artır. "Qarabağ"da qapıçının işi az olur.

- "Sumqayıt"da adaptasiya prosesi necə keçdi?

- "Qarabağ"da çox az oynayırdım. Demək olar ki, mövsüm ərzində 3-4 oyuna çıxırdım. Son vaxtlar daha az şans qazanırdım. "Sumqayıt"a keçəndən sonra bir qədər narahatlıq oldu. Yəni özümü hazır hesab etmirdim. Sonradan oyunlara çıxdıqca əvvəlki formamı bərpa etməyə başladım.

- İndi özünü yaxşı formada hesab edirsən?

- Bəli. Getdikcə oyunumu artırıram. Məşqçilərin sayəsində özümdə inkişaf hiss edirəm.

- Millidən dəvət gözləyirsən, yoxsa 37 yaşında sənə çətin olar?

- Hələ karyeramı bitirmək fikrim yoxdur, oynayıram. Əlbəttə, hər bir futbolçunun arzusu milli komandaya dəvət almaqdır. Mən də millidə oynamışam. Bir neçə ildir ki, çağırılmıram. Bu da oyun təcrübəmin azlığı ilə əlaqədar idi. İndi şükürlər olsun ki, sabit çıxış edirəm. Hər şey milli komandamızın baş məşqçisi Robert Prosineçkidən asılıdır. Bir təcrübəli qapıçı kimi məni də dəvət etsə, sevinərəm.

- "Sumqayıt" ötən illərlə müqayisədə bu mövsüm daha inamlı çıxış edir. Qarşıya hansı məqsədlər qoyulub?

-  Çalışırıq ki, maksimum yuxarı pillələrdə olaq. Qarşımıza Avroliqaya vəsiqə qazanmaq məqsədi qoyulmayıb. Hazırda yaxşı yerdəyik. Çalışacağıq ki, 4-cü pilləni əldən verməyək. Ancaq daha yuxarı yerləri tutmaq istəyirik.

- Yerli gənc futbolçularla çətin olmayacaq?

- Baş məşqçimiz çalışır ki, yerli futbolçularla nəsə edək. Gənc futbolçularımızın oyunu göz qabağındadır. Məşqçilərimiz onlardan razıdır. Əzmkar komandamız var.

Ramiq AĞAMƏMMƏDOV