Ölümün ayıra bilmədiyi dost

Ölümün ayıra bilmədiyi dost
XƏBƏR 17 Fevral 2010 / 12:53 2434
-  A +

Mən onun toyunda iştirak edə bilmədim, halbuki dəvətliydim. Mən onun evinə qonaq gedə bilmədim, hərçənd o məni dəfələrlə qonaq dəvət etmişdi. Sevimli klubunda işə düzələndə çox sevindim, amma bu sevinc kədərə çevrildi. Ötən şənbə günü onu təkcə mən yox, bütün tanıyanlar itirdi. Vəzifə borcunu yerinə yetirərkən Yevlaxdan Bakıya qayıdan zaman qəza Alim Malikoğlunun vaxtsız vəfatına səbəb oldu. Onun ölümü yaxınları və həmkarları üçün faciəyə çevrildi.
Onunla tanışlığımız “168 saat” qəzetinin redaksiyasından başladı. Sonradan “Futbol-proqnoz” nəşrində birlikdə işlədik. Özünə qarşı tələbkar olan Alim həmişə həmkarlarının uğuruna sevinərdi. Yaranan problemlərə müxtəlif yanaşmaları analiz edər, düzgün qərar qəbul edərdi. Yevlaxa səfərdən imtina edə bilməzdi, çünki bu onun işi idi.
Onun toyuna gələ bilmədim. Çəkiliş axşam saat 10-a qədər uzandı, sonda yağışlı havada toyun keçirildiyi Sumqayıta gedə bilməyəcəyimi başa düşüb zəng vurmalı oldum. Alimdən məni bağışlamağı xahiş etdim. Müxtəlif səbəblərdən onun evinin qonağı olmadım. Gah vacib iş çıxırdı, gah da başqa problemlər görüşümüzə imkan vermirdi. Bazar ertəsi evində oldum, amma artıq Alim həyatda yox idi.
Alim televiziyanı tərk edəndə sirr olaraq söyləmişdi ki, yenidən qayıtmaq istəyir. Müxtəlif sayt və qəzetlərdən təklif olmasına baxmayaraq, müsbət cavab vermədi. “Neftçi”də işləmək təklifi onun üçün böyük hədiyyə oldu. Axı, Alim artıq “Neftçi”yə azarkeşlik edəcəyini gizlətməyəcəkdi. O, flaqmanı digər klublardan çox istəyirdi. Həmişə zarafatyana çempionluq “Neftçi”lik deyil” söyləyəndə əsəbiləşərdi.
“Neftçi”də cəmi 15 gün işlədi. Alim Malikoğlunun faciəvi ölüm xəbərini... ...mənə doğum günümdə çatdırdılar.
Oğlu dünyaya gələndə o artıq övladını gələcəkdə futbolçu görmək istədiyini dəqiqləşdirmişdi. Türk futbolçu Nihat Kahveçinin şərəfinə oğluna Nihat adını qoydu. Çünki onu yaşıl meydanlarda görmək istəyirdi. Ümid edirəm ki, belə də olacaq. Oğlunu yaşıl meydanda görəcək...
...O dünyadan baxanda.
Allah rəhmət eləsin
Sənan ŞƏFİZADƏ
 
 

 


Son xəbərlər