Ronaldonun "Real"a vida sözləri

Ronaldonun "Real"a vida sözləri
GÜNDƏM 10 İyul 2018 / 20:31 8382
-  A +

“Real”da, Madriddə keçirdiyim illər həyatımın ən xoşbəxt anlarıdır. Bütün bunlara görə kluba  minnətdarlığımı bildirirəm. Mənə göstərdikləri sevgiyə görə hər kəsə təşəkkür edirəm”.

Qol.az xəbər verir ki, bu sözləri Kriştiano Ronaldo “Real”ın rəsmi saytına açıqlamasında deyib. Bu gün “Kral klubu”ndan ayrılması və “Yuventus”a keçəcəyi rəsmiləşən futbolçu təəssüratlarını bölüşüb:

“Buna baxmayaraq, hesab edirəm ki, həyatımda yeni səhifə açmağın vaxtı çatmışdı. Buna görə də klubdan məni buraxmasını xahiş etdim. Mən belə hiss edirəm və hamıdan, xüsusilə də azarkeşlərdən məni başa düşmələrini istəyirəm.  Bu 9 ildə onlar həqiqətən mənə möhtəşəm dəstək oldular. Burada onlarla 9 gözəl il keçirdim. Mənim üçün həyəcanverici, bir o qədər də ağır dönəm oldu. Çünki “Real”ın hədəfləri yüksəkdir və səndən çox şey tələb edirlər. Amma çox yaxşı bilirəm ki, burada futboldan tam fərqli zövq aldım”.

Komanda yoldaşları haqda danışan Ronaldo qazandığı uğurlarda onların da rolunun olduğunu bildirib: “Mənim həm meydanda, həm də paltardəyişmə otağında mükəmməl komanda yoldaşlarım var idi. Onların inanılmaz mehribanlığını hiss etdim və biz birlikdə ardıcıl 3, 5 ildə isə 4 çempionluq qazandıq. Onların sayəsində 4 dəfə “Qızıl top”, 3 dəfə isə “Qızıl buts” mükafatına layiq görüldüm. Bütün bunları mən bu böyük və qeyri-adi klubda qazandım.

“Real” mənim və ailəmin qəlbini fəth etdi. Məhz bu səbəbdən kluba, onun prezidentinə, direktoruna, komanda yoldaşlarıma, bütün texniki işçilərə, həkimlərə, fizioterapevtlərə və ümumilikdə  işçilərə öz təşəkkürümü bildirirəm. Azarkeşlərimizə sonsuz minnətdaram. Həmçinin İspaniya futboluna “sağ ol” deyirəm. 9 maraqlı il ərzində qarşımda hər zaman əla futbolçular oynadı.
 
Çox düşündüm və bilirəm ki, karyeramda yeni mərhələ üçün vaxt yetişib. Gedirəm, amma burda olmasam da, bu forma, “Santyaqo Bernabeu” stadionu  əbədi olaraq qəlbimdə və yaddaşımda qalacaq. Hamınıza təşəkkür edir, 9 il öncə ilk dəfə bu stadionda işlətdiyim sözü deyirəm: “Hala Madrid”.

Qeyd edək ki, “Real” bu gün Ronaldonun “Yuventus”a keçəcəyini təsdiqləyib.

 

Daha çox


Son xəbərlər
14.12.18  22:33

Roys birinci oldu

14.12.18  21:05

Yalquzaq

14.12.18  13:52

"Dəli"nin 28-ci klubu