"Yalan danışdığımı etiraf edirəm" - Elyunussi

"Yalan danışdığımı etiraf edirəm" -  Elyunussi
MÜSAHİBƏ 18 Sentyabr 2017 / 12:00 11496
-  A +

"Qarabağ”ın norveçli yarımmüdafiəçisi Tarik Elyunussi Topaz Premyer Liqanın 5-ci turunda "Kəpəz”ə qalib gəldikləri oyundan (2:0) sonra Qol.az-ın müxbirinin də iştirak etdiyi brifiqndə jurnalistlərin suallarını cavablandırıb.

- Premyer Liqamızda debüt matçında azarkeşlərin sayı xeyli az idi. Bu, səni təəccübləndirdi?

- Başqa cür gözləyirdim, lakin matça az azarkeş gəlməsi böyük problem deyil. Təbii ki, fanatların sayının az olmasına üzülürəm. Ancaq bizim işimiz oynamaq və qələbə qazanmaqdır. Daha yaxşı nəticələr olduqca, tərəfdarlar da artacaq.
 
- "Qarabağ”da  hədəfin nədir?

- Hədəfim komandaya qələbə qazanmaqda kömək etməkdir. Mən komanda oyunçusuyam. Birlikdə mübarizə aparanda mənə daha xoş gəlir. Burada uğurlu nəticələr əldə etmək istəyirəm. Əlbəttə, qol vurmaq və məhsuldar ötürmələr vermək yaxşı olardı. Lakin bu, bonusdur. "Qarabağ”la ölkə çempionluğunu qazanmaq istəyirəm. Bununla yanaşı, Çempionlar Liqasında bütün gücümü qoymağı və böyük təcrübə əldə etməyi hədəfləyirəm.
 
- Bu günə qədər Azərbaycan və ölkə futbolu barədə nə bilirdin?

- İndiyə qədər burada iki dəfə olmuşdum. Bakını çox bəyənmişəm və futbol barədə də xəbərim var. "Qarabağ” haqda da eşitmişəm. Çünki Ağdam klubu Avropa Liqasında keçmiş komandam Norveç "Rusenborq”una qarşı iki dəfə oynayıb. Düzdür, həmin matçlarda iştirak etməmişəm. Lakin məlumatlıyam. "Qarabağ” hər zaman ölkə çempionluğuna oynayır. Eyni zamanda Avropa Liqasının qrup mərələsində də matçlarını izləmişəm. "Qarabağ” Azərbaycanın böyük klubudur. Azərbaycan mənim üçün yeni ölkədir. Burada fərqli mədəniyyət və adətlərlə qarşılaşıram. Bu da bir təcrübədir. Qazandığım təcrübə mənə gələcəkdə kömək edəcək.
 
- "Qarabağ”a keçdiyini Norveç yığmasının heyətində Azərbaycan millisinə qarşı keçirdiyiniz DÇ-2018-in seçmə mərhələsinin oyunundan sonra xəbər tutduğunu söyləmişdin. Halbuki matç ərəfəsində bu barədə məlumatsız olduğunu açıqlamışdın. Həqiqətən bu cür olub?


- Bəli, həmin dövrdə "Qarabağ”la danışıq aparırdım. Düşünürdüm ki, əvvəlcədən bu barədə danışmağım oyuna köklənməyimə mane olacaq. Yalan danışdığımı etiraf edirəm. Bəzən vəziyyətdən asılı olaraq bu cür addım atmağa məcbur qalırsan. Azərbaycanla görüş bizim üçün çox vacib idi. Fikrimi dağıda bilməzdim. Ona görə başqa komanda ilə danışıq aparmağımla bağlı heç nə demədim. Həm də oyundan əvvəl hər şey yüz faiz həll olunmamışdı. Məsələ tam həllin tapsaydı, bu barədə açıqlama verəcəkdim. Matçdan sonra dəqiqləşdiyi üçün əvvəlcə başqa cür danışmalı idim.
 
- Yunanıstanın "Olimpiakos” kimi güclü klubundan "Qarabağ”a gəlmisən. Ağdam klubunu seçməyinin səbəbi nədir?

- Açığı, "Olimpiakos”da işlərim o qədər də yaxşı getmirdi. Yay fasiləmiz qısa alınmışdı. Cəmi 10 gün istirahət edib, toplanışa bir qədər gec qoşuldum. Üstəlik, çıxış etdiyim mövqeyə bir neçə futbolçu gətirilmişdi. Gördüyüm qədərilə baş məşqçi məni əsas heyətdə düşünmürdü. Mənə daha çətin olacaqdı. Ona görə də belə bir seçim etməli oldum. Çempionlar Liqasında oynamaq şansımı qaçıra bilməzdim. Bu, mənim arzum idi. Hesab edirəm ki, bura gəlməklə səhv etməmişəm və "Qarabağ”la böyük nəticələr əldə edə bilərəm. "Qarabağ” da çox böyük klubdur. Təklif gələn kimi şansı boşa vermədim.
 
- Yunanıstanlı azarkeşləri çılğınlıqları ilə seçilirlər. Azərbaycanda tribunaları boş görən zaman təəccüblənmədin ki?

- "Qarabağ” azarkeşlərinin sona qədər dəstək vermək bacarığını bilirdim. Sosial mediada gələn mesajlardan hiss etdim ki, məni burada sevirlər. "Çelsi”yə böyük məğlubiyyətdən sonra belə dəstək vermələri alqışalayiqdir. Hamısı mənə "hesaba fikir vermə, hər şey yaxşı olacaq” deyirdilər. "Kəpəz"lə görüşə cəmi iki min azarkeş gəlsə də, onların sona qədər dəstək olmaları vacibdir. Bu, saydan önəmlidir.
 
- "Qarabağ”la mövsümün sonuna qədər müqavilən var. Uzatmağı düşünürsən?

- Bu barədə danışmaq hələ çox tezdir. Hələ birinci oyunuma çıxmışam.

Daha çox


Son xəbərlər
28.03.24  10:55

Qrizmann qayıtdı

27.03.24  21:58

Keyn sağaldı