Reytinq ipindən yapışıb haracan gedə bilərik? [24.06.2014] Rövşən Binnətli Qitəmiqyaslı klub turnirlərinin ilkin mərhələlərinin püşkü atıldı. Dünya XX mundialın həyəcanı ilə yaşadığından, ola bilsin, püşkatma mərasimi bir az kölgədə qaldı. Amma müşahidələr deməyə əsas verir ki, bu yalnız ilk baxışda belədir və əslində, püşkatmanın nəticələri azarkeşlərimizin böyük marağına səbəb olub. Artıq hər kəsə məlumdur ki, Azərbaycan çempionu “Qarabağ” mübarizəyə Malta, ölkə kubokunun sahibi “Neftçi” ya Sloveniya, ya Monteneqro, gümüş mükafatçı “İnter” Moldova, nəhayət, mövsümü tarixində ilk dəfə bürünc medalla bitirmiş “Qəbələ” Bosniya-Herseqovina təmsilçisi ilə başlayacaq. Yeni avrokubok mövsümünə 10,375 balla 31-ci pillədə qədəm qoyuruq. Rəqib klubların təmsil etdiyi ölkələrə gəlincə, bizimlə eyni göstəriciyə malik Moldova 32-ci, Bosniya-Herseqovina 7,500 xalla 35-ci, Malta isə 4,833 xalla 45-cidir. O ki qaldı “Neftçi”nin üz-üzə gələ biləcəyi kollektivə, Monteneqro aktivində 6,000 reytinq balı ilə 39-cu, Sloveniya 11,000 xalla 29-cudur. Göründüyü kimi, bu siyahıda təkcə Sloveniya Azərbaycandan irəlidədir və klublarımız uğurlu çıxış sayəsində mövqeyini möhkəmlədə, hətta adını üçüncü onluqda qərarlaşanların cərgəsinə yaza bilər. Xüsusi vurğulamağa ehtiyac var ki, futbolçularımız nəinki bu il hesabdan silinəcək 1,500 reytinq balının yerini doldurmalı, həmçinin onu daha da artırmaq kimi çətin vəzifənin öhdəsindən gəlməlidirlər. Müqayisə üçün deyək ki, Moldova bu il daha böyük itkini (2,175) aradan qaldırmalıdır. Bosniya-Herseqovinada bu göstərici 1,750, Monteneqroda 1,125, Maltada 0,750-dir. Azərbaycandan irəlidə olan Sloveniya isə 1,375 reytinq xalının, necə deyərlər, qarşılığını vermək məcburiyyətindədir. Bu mənada, 2014/15-ci il mövsümündə hansı ölkələrdən önə keçə bilərik? Hazırkı vəziyyətdən çıxış edərək, üç ölkəni geridə qoymaq imkanımızın olduğunu demək mümkündür – bunlar 11,000 xalla 29-30-cu pilləri bölüşən Sloveniya və Slovakiya, həmçinin aktivindəki 11,625 reytinq balı ilə 28-ci olan Macarıstandır: sloveniyalılar ötən ili 2,625, slovaklar 1,625, macarlar isə 0,875 göstərici ilə biritiblər. Norveç (14,275, 26-cı yer) və Serbiya (14,125, 27-ci yer) indilikdə əlçatmazdır. Təbii ki, başlıca vəzifə əlavə heç nə fikirləşmədən bütün diqqəti, ilk növbədə, qarşıdakı məsul oyunlara yönəltməkdir. Lakin fərdi maraqlarla yanaşı, ümumi işə də töhfə vermək fəaliyyətin tərkib hissəsi sayılır. Bəzən ilk oyunda qeydə alınan qanqaraldıcı nəticə cavab qarşılaşmasına ciddi şəkildə mənfi təsir göstərir və futbolçular meydana “onsuz da məğlubiyyətin əvəzini çıxa bilməyəcəyik” düşüncəsi ilə çıxırlar. Bu, yolverilməzdir və təmsilçilərimiz Azərbaycanın klub reytinqini formalaşdırdıqlarını gərək, bir an da olsa, unutmasınlar. Yalnız o halda ən yaxın izləyicilərindən uzaqlaşa, ən yaxın izlədiklərini isə ötüb keçə bilərsən. Rövşən BİNNƏTLİ |