Samir Abbasov: “Zlatinov qələt eləyir…”

- Samir “Karvan”la oyun necə keçdi?

- Biz komandamızın gücünə bələd idik. Cütün taleyini elə ilk oyunda həll etmək istəyirdik ki, Yevlaxda problemimiz olmasın.  “Karvan” öz meydanında çox yaxşı oyun göstərir. Yevlaxda oynamaq komandalar üçün baş ağrısına çevrilib.

- Demək olarmı ki, “İnter” artıq cütün taleyini həll edib?

- Bəli.

- “İnter” son iki il ərzində kubokun finalına kimi yüksələ bilib. Amma finalda nədənsə komandanız uğursuz çıxış edir. Keçən il “Qarabağ”a , bundan əvvəl isə “Xəzər Lənkəran”a məğlub oldunuz. Səncə, bu il necə olacaq?

- Bizim builki məqsədimiz həm çempionluq, həm də ölkə kubokunu qazanmaqdır. Təbii ki, indidən nələrin baş verəcəyini proqnozlaşdırmaq mümkün deyil. Amma ölkə kubokunu qazanmağı çox istəyirik.

- Ümumiyyətlə, kuboku qazanmağa hansı komandaların şansı  daha çoxdur?

- Bilirsiz, kubok oyunlarında sürprizlər tez-tez baş verir. Birinci divizionun komandası belə rəqibinə qarşı müqavimət göstərir. Gənc oyunçular özlərini göstərmək üçün çalışırlar. Bu səbəbdən hansısa klubun adını çəkə bilmərəm.

- Samir “altılıq” sistemi haqqında nə fikirdəsən? Bu sistemin tərəfdarları olduğu kimi, narazılıqlarını bildirənlər də var…

- Mən bu sistemin yaxşı-pis olmağını deyə bilmərəm. Amma onu deyə bilərəm ki, oyunların sayının çox olması müsbət haldır. Xarici ölkələrin çempionatlarında olduğu kimi, 2-3 gündən bir oyun oynayırsan. Artıq futbolla yaşamağa başlayırsan. Tutaq ki, dünən “Karvan”la oynadıq. İki gündən sonra isə “Qarabağ”la çox çətin görüşümüz var. Demək istəyirəm ki, oyunların sayının çoxluğu bizə yaxşı mənada təsir edir. Amma digər tərəfdən bu sistemin özünü mən hələ ki, anlaya bilməmişəm. Necə olacaq, sonda xallar necə hesablanacaq, bu barədə heç bir fikrim yoxdur.

- Oyunların çoxluğunun yaxşı hal olduğunu bildirirsən. Bəs, bizim futbolçular bu qədər yük altında oynamağı bacarırlar?

- Qoy, bacarsınlar da. Bütün günü boş-boş danışırıq ki, filan futbolçumuzu filan klub çağırır. Bəs yaxşı, tutaq ki, hansısa futbolçumuz getdi xaricdə oynamağa. Ordakı yüklənmə altında oynamağı bacaracaq? İki-üç gündən bir oyunlara çıxa biləcək? Ona görə yaxşısı budur ki, uşaqlar indidən bu cür təzyiq altında çıxış etməyə öyrəşsinlər. Çətinliyin nə olduğunu görsünlər. Yoxsa, millinin təlim-məşq toplanışına gələndən sonra bəziləri deyir ki, yorulmuşuq. Çempionatda öz oyunumuzu göstərə bilmirik. Qardaş, yorulursan, gəlmə milliyə.

- Futbolçularımızın xaricə getmək ehtimalından söhbət düşdü. Necə düşünürsən, indiki halda bizdən kim rahatlıqla legioner həyatı yaşaya bilər?

- Qardaşım, burda kor-kor, gör-gördü. Nə heç kimi tərifləmirəm, nə də kimdənsə çəkinəcəyim var. İndiki halda Azərbaycandan kənara çıxıb oynaya biləsi iki futbolçumuz var. Vaqif Cavadov və Mahir Şükürov. Qaldı ki, Ruslan Abışova o da gedə bilər. Amma o gərək getdiyi komandada dayanmadan məşq edə, öz üzərində işləyə. Amma Ruslanı indi hansısa xarici klubda əsas heyətdə oynamağa hazır görmürəm. Azərbaycan səviyyəsində Ruslan çox yaxşı futbolçudur.

- Mahir Şükürov və Vaqif Cavadovun adını çəkdin. Səncə, onlar hansı ölkə çempionatında rahatlıqla oynaya bilərlər?

- Rusiya Premyer liqasında oynaya bilərlər. Rəşad Sadıqovun dediyinə görə, onların Türkiyədə də oynamağa gücləri çatar. Hətta Superliqanın adi klublarına keçib, oradan da  karyeralarını “dörd böyüklər”də davam etdirə bilərlər. Kamran Ağayevi isə xüsusi vurğulamaq istəyirəm. Kamran dünyanın istənilən çempionatında problemsiz oynaya bilər. Qapıçılarımızdan xaricdə oynaya biləcək gücü yalnız Kamranda görürəm. Digərlərini heç yaxında buraxmıram.

- Heç Rəşad Sadıqovun adını çəkmədin…

- O yazıq zədəlidir axı. Zədələrdən heç başı açılır ki? Səncə, onu zədəli-zədəli hansı klub heyətinə götürmək istəyər? Rəşadın tezliklə qayıtmasını gözləyirik. Onunla millidə birgə oynayarkən insan özünü rahat hiss edir.

- Şənbə günü çempionatın növbəti turu çərçivəsində “Qarabağ”la qarşılaşırsınız. Komanda yoldaşın Peter Zlatinov bu gün mətbuata verdiyi açıqlamasında bildirib ki, “İnter” “Qarabağ”ı rahatlıqla məğlub edəcək. Sən necə düşünürsən?

- Zlatinov qələt eləyib, başını daşa döyür. Mən deyə bilmərəm ki, “İnter” “Qarabağ”dan güclüdür. Bunu oyun göstərəcək. “Qarabağ” rəhbərliyi çox ağıllı və uzaqgörən siyasət yürüdürlər. Hansı ki, indiyə kimi bunu heç bir klub etməmişdi. Sizdən qabaq məndən bu oyunla bağlı zəng edib müsahibə aldılar. Mən deyirəm ki, hansı komandanın qalib gəlməsindən daha çox bu oyunu azarkeşlər üçün əsl futbol tamaşasına çevirmək lazımdır. İstəyirəm ki, qırğın bir oyun alınsın. Qorxmaq futbol göstərməyək.

- Çempionatın səviyyəsində irəliləyiş hiss edirsən?

- Çox irəliləyiş var. Əvvəl çempionluğa 3-4 komanda oynayardı. Amma indi bütün komandaların şansları var. Gənclər layiqli müqavimət göstərirlər. Xaricdən yaxşı məşqçilər gəlir. Hər məşqçi də çempionluq üçün gəlir ki, bu da rəqabətin artmasına gətirib çıxarır.

- Çempionluğa kimi namizəd görürsən?

- “İnter” , “Qarabağ” və “Xəzər Lənkəran”ı daha şanslı görürəm.