Legionerlərimiz yığmanın məşqlərinə gəlməyəcəklər

XƏBƏR 28 Noyabr 2008 / 13:43 3720
-  A +

Azərbaycan yığmasının qarşıdakı təlim-məşq toplanışına çağırılan futbolçulardan dördü düşərgəyə qatılmayacaq. Müdafiəçi Saşa Yunisoğlu, yarımmüdafiəçi Anatoli Ponomaryov və hücumçular Branimir Subaşiçlə Leandro Qomeş dekabrın 1-dən 3-dək keçiriləcək hazırlığa gəlməyəcəklər.

Subaşiçlə (“Srvena Zvezda”, Serbiya) Yunisoğlunun (“Polonya”, Polşa) çıxış etdikləri çempionatlarda mövsüm davam edir. Klubları təlim-məşq toplanışının FİFA-nın təqviminə uyğun gəlmədiyi üçün futbolçularımızı yığmaya buraxmır. Ponomaryovun son vaxtlar çıxış etdiyi İsveçdə mövsüm bitdiyindən, belə problem yoxdur. Sadəcə, özünə yeni klub axtaran Anatoli bunun üçün vaxtın verilməsini yığmanın məşqçilərindən xahiş edib.

Bakının “Olimpik” klubundan oynayan Qomeşdə isə problem başqadır. Milli komandamızın qarşıdakı hazırlıq prosesi sonradan bəlli oldu və Qomeş də ilk dövrə bitəndən sonra istirahət məqsədilə vətəninə bileti erkən alıbmış. Yığmanın məşqçiləri də bunu nəzərə alaraq, Leandroya vətəninə tez yollanmasına əngəl olmayıb. Qomeşin “Olimpik”dəki komanda yoldaşı Usim Ndukanın isə zədəsi var. Nigeriyalı müdafiəçi yığmamızın düşərgəsinə qatılsa belə, onun sağlıq durumuna milli komandamızın həkimləri qərar verəcək.

Qeyd edək ki, milli komandamızın baş məşqçisi Berti Foqts toplanışa 37 futbolçu çağırmışdı. Bunlardan 4-ü kənarda qaldıqdan sonra 33 oyunçunu sərəncamında görəcək alman mütəxəssis yığma üzvlərini tibbi müayinədən keçirəcək.

 

Mənbə: apasport.az


Son xəbərlər
28.03.24  10:55

Qrizmann qayıtdı

27.03.24  21:58

Keyn sağaldı